‘നോക്കാൻ പറ്റില്ല, ഇറങ്ങിപ്പോകൂ...!’: പാമ്പ് കടിയേറ്റെത്തിയ യുവതിക്ക് ചികിത്സ നിഷേധിച്ച് പൊന്നാനി താലൂക്ക് ആശുപത്രിയിലെ ഡോക്ടർ; പ്രതിഷേധം ശക്തം
പൊന്നാനി: പാമ്പ് കടിയേറ്റ് കടുത്ത ശാരീരിക അസ്വസ്ഥതകളോടെ ആശുപത്രിയിലെത്തിയ യുവതിക്ക് അടിയന്തര ചികിത്സ നിഷേധിച്ചതായി പരാതി. പൊന്നാനി സർക്കാർ താലൂക്ക് ആശുപത്രിയിലെ ഡ്യൂട്ടി ഡോക്ടർക്കെതിരെയാണ് എടപ്പാൾ പാടത്തങ്ങാടി സ്വദേശിനി ഷഹല തസ്നി ഗുരുതര ആരോപണങ്ങളുമായി രംഗത്തെത്തിയത്. പാമ്പ് കടിയേറ്റതിനെത്തുടർന്ന് രക്തം ഛർദ്ദിക്കുന്ന അവസ്ഥയിലായിരുന്ന തന്നോട് ഡോക്ടർ അപമര്യാദയായി പെരുമാറുകയും ഇറക്കിവിടാൻ നോക്കുകയും ചെയ്തതായി യുവതി പറയുന്നു.
തുടർന്ന് പോലീസിൽ വിവരമറിയിക്കുകയും, പൊലീസിൻ്റെ ശക്തമായ ഇടപെടലിനെത്തുടർന്ന് മാത്രമാണ് ആശുപത്രി അധികൃതർ ഇൻജെക്ഷനും പെയിൻകില്ലറും നൽകാൻ തയ്യാറായതെന്നും ഷഹല വ്യക്തമാക്കുന്നു.
'നോക്കാൻ പറ്റില്ല, ഇറങ്ങിപ്പോകൂ...'
അനുഭവിച്ച ദുരനുഭവം ഷഹല വിവരിക്കുന്നത് ഇങ്ങനെ:
"കടുത്ത വേദന സഹിക്കാൻ വയ്യാതെയാണ് ഞാൻ ആശുപത്രിയിലെത്തിയത്. ഒ.പി ടിക്കറ്റെടുത്ത് ഡോക്ടറെ കണ്ടപ്പോൾ ഇവിടെ ഒന്നും ചെയ്യാൻ കഴിയില്ലെന്നും ഫിസിഷ്യനെ തന്നെ കാണിക്കണമെന്നുമായിരുന്നു മറുപടി. വേദന സഹിക്കാൻ വയ്യാത്തതുകൊണ്ട് എന്തെങ്കിലും താൽക്കാലിക ചികിത്സ നൽകണമെന്ന് അഭ്യർത്ഥിച്ചപ്പോൾ 'ഇറങ്ങിപ്പോകൂ' എന്ന് പറഞ്ഞ് വളരെ മോശമായ രീതിയിലാണ് ഡോക്ടർ പെരുമാറിയത്. മര്യാദയ്ക്ക് സംസാരിക്കണം എന്ന് പറഞ്ഞപ്പോൾ സെക്യൂരിറ്റിയെ വിളിച്ച് എന്നെ പുറത്താക്കാൻ ആവശ്യപ്പെട്ടു."
കടുത്ത ശാരീരിക വേദന അനുഭവിക്കുന്ന സമയത്താണ് ആശുപത്രി അധികൃതരിൽ നിന്നും സെക്യൂരിറ്റി ജീവനക്കാരിൽ നിന്നും ഇത്തരമൊരു മോശം അനുഭവം ഉണ്ടായതെന്ന് യുവതി വ്യക്തമാക്കുന്നു.
ഡോക്ടർക്കെതിരെ പോലീസ് സ്റ്റേഷനിൽ പരാതി
അടിയന്തര ഘട്ടത്തിൽ ചികിത്സ നിഷേധിക്കുകയും പൊതുജനങ്ങളോട് ക്രൂരമായ രീതിയിൽ അപമര്യാദയായി പെരുമാറുകയും ചെയ്ത പൊന്നാനി താലൂക്ക് ആശുപത്രിയിലെ ഡ്യൂട്ടി ഡോക്ടർക്കെതിരെ യുവതി പൊന്നാനി പോലീസ് സ്റ്റേഷനിൽ ഔദ്യോഗികമായി പരാതി നൽകിയിട്ടുണ്ട്. സംഭവത്തിൽ വ്യാപകമായ പ്രതിഷേധമാണ് പ്രാദേശികമായി ഉയരുന്നത്. കടിയേറ്റത് ഏതുതരം പാമ്പാണെന്ന് പോലും പരിശോധിക്കാൻ നിൽക്കാതെ, ഗുരുതരാവസ്ഥയിലുള്ള രോഗിയെ പുറത്താക്കാൻ ശ്രമിച്ച അധികൃതരുടെ നടപടിക്കെതിരെ ശക്തമായ നടപടി വേണമെന്നാണ് നാട്ടുകാരുടെ ആവശ്യം.
Comments
Post a Comment