ഐടി ജോലിയിലെ സമ്മർദം മടുത്തു; ഒമ്പത് വർഷത്തെ കരിയർ ഉപേക്ഷിച്ച് ഓട്ടോ ഡ്രൈവറായി യുവതി
കൊച്ചി: ഐടി മേഖലയിലെ കടുത്ത ജോലി സമ്മര്ദങ്ങളും തിരക്കുകളും മടുത്ത് ഔദ്യോഗിക ജീവിതത്തിന് വിട നല്കി, വ്യത്യസ്തമായ പാത തിരഞ്ഞെടുത്ത് ശ്രദ്ധേയയാകുകയാണ് ഒരു യുവതി. ഒമ്പത് വര്ഷത്തോളം ഐടി മാനേജരായി ജോലി ചെയ്ത ശേഷം, ഇപ്പോൾ സ്വന്തമായി ഓട്ടോറിക്ഷ ഓടിച്ച് മാസം 60,000 രൂപയോളം വരുമാനം നേടുന്ന ഈ യുവതിയുടെ കഥ സമൂഹമാധ്യമങ്ങളിലും വലിയ ചർച്ചയായിരിക്കുകയാണ്.
സംരംഭകയായ നെസ്രിൻ മിദ്ലാജ് തന്റെ ഇന്സ്റ്റഗ്രാം പേജിലൂടെയാണ് ഈ വേറിട്ട ജീവിതമാറ്റത്തെക്കുറിച്ചുള്ള വിവരം ലോകത്തോട് പങ്കുവെച്ചത്. യാദൃശ്ചികമായി ഈ വനിതാ ഓട്ടോ ഡ്രൈവറെ കണ്ടുമുട്ടിയതും, അവരുമായി നടത്തിയ സംഭാഷണവുമാണ് നെസ്രിനെ ഈ കുറിപ്പ് എഴുതാൻ പ്രേരിപ്പിച്ചത്.
സമാധാനം തേടിയുള്ള യാത്ര
ആത്മവിശ്വാസത്തോടെ വാഹനമോടിക്കുന്ന ഈ യുവതിയെ കണ്ടപ്പോൾ തന്നെ നെസ്രിന് കൗതുകം തോന്നി. തുടര്ന്ന് നടത്തിയ സംഭാഷണത്തിലാണ് താൻ ഒരു ഐടി മാനേജർ ആയിരുന്നുവെന്നും, കോര്പ്പറേറ്റ് ലോകത്തെ കടുത്ത മാനസിക സമ്മർദങ്ങളിൽ നിന്ന് രക്ഷപ്പെടാനാണ് ജോലി രാജിവെച്ചതെന്നും യുവതി വ്യക്തമാക്കിയത്. ഉയർന്ന പദവികളും സൗകര്യങ്ങളും ഉപേക്ഷിച്ച് തനിക്ക് മാനസിക സമാധാനം നൽകുന്ന ഒരു തൊഴിലിലേക്ക് മാറിയതിലുള്ള സന്തോഷം അവർ പങ്കുവെച്ചു.
ധീരമായ തീരുമാനം
പുരുഷന്മാർ ആധിപത്യം പുലർത്തുന്ന ഒരു മേഖലയിൽ ജോലി ചെയ്യുന്നത് എങ്ങനെ തോന്നുന്നു എന്ന നെസ്രിന്റെ ചോദ്യത്തിന് വളരെ ആത്മവിശ്വാസത്തോടെയായിരുന്നു യുവതിയുടെ മറുപടി. "പദവികള്ക്ക് പിന്നാലെ ഓടുന്നതിനിടയില്, യഥാർത്ഥത്തിൽ നമ്മളെ ജീവിക്കാൻ പ്രേരിപ്പിക്കുന്നത് എന്താണെന്ന് സ്വയം ചോദിക്കാൻ നമ്മള് പലപ്പോഴും മറന്നുപോകുന്നുണ്ട്. ചിലപ്പോള് വലിയ പദവികളേക്കാൾ സമാധാനത്തിന് മുൻഗണന നൽകുന്നത് നിങ്ങള്ക്ക് എടുക്കാവുന്ന ഏറ്റവും ധീരമായ തീരുമാനമായിരിക്കും," നെസ്രിൻ തന്റെ പോസ്റ്റിൽ കുറിച്ചു.
പ്രചോദനമായി മാറുന്ന ജീവിതം
സൗകര്യപ്രദമായ ജീവിതം ഉപേക്ഷിച്ച് സ്വന്തം സന്തോഷം കണ്ടെത്താൻ ധൈര്യം കാണിച്ച ഈ യുവതിയെ അഭിനന്ദിച്ച് നിരവധി പേരാണ് രംഗത്തെത്തിയിരിക്കുന്നത്. "സമ്മർദത്തിന് കീഴിൽ ജീവിക്കുന്നതിനേക്കാൾ നല്ലത് സമാധാനത്തോടെ ജീവിക്കുന്നതാണ്. മാനസികാരോഗ്യത്തിന് മുൻഗണന നൽകിയ യുവതിയുടെ തീരുമാനം മറ്റുള്ളവർക്ക് വലിയൊരു പ്രചോദനമാണ്," എന്നിങ്ങനെ നീളുന്നു സോഷ്യൽ മീഡിയയിലെ പ്രതികരണങ്ങൾ.
ജീവിതവിജയം എന്നാൽ പദവികൾ മാത്രമല്ല, മറിച്ച് നമ്മൾ എത്രത്തോളം സന്തോഷത്തോടെയും സമാധാനത്തോടെയുമാണ് ജീവിക്കുന്നത് എന്നതിലാണ് ഉള്ളതെന്ന് ഓർമ്മിപ്പിക്കുകയാണ് ഈ ഐടി ഉദ്യോഗസ്ഥ.
Comments
Post a Comment