അഞ്ച് വയസ്സുകാരിയെ പീഡിപ്പിച്ച കേസ്: പ്രതിക്ക് 72 വർഷം കഠിനതടവും പിഴയും; വിധി പറഞ്ഞ് പെരുമ്പാവൂർ പോക്സോ കോടതി

 

പെരുമ്പാവൂർ: അഞ്ച് വയസ്സുള്ള പെൺകുട്ടിയെ മിഠായി വാങ്ങിത്തരാമെന്ന് പറഞ്ഞ് പ്രലോഭിപ്പിച്ച് പീഡിപ്പിച്ച കേസിലെ പ്രതിക്ക് 72 വർഷം കഠിനതടവും പിഴയും ശിക്ഷ. ബിഹാർ മുസാഫർപൂർ സ്വദേശി നജീർ മിയാനെ (55) ആണ് കുറ്റക്കാരനെന്ന് കണ്ടെത്തിയതിനെത്തുടർന്ന് പെരുമ്പാവൂർ അതിവേഗ പോക്സോ കോടതി ശിക്ഷിച്ചത്. ജഡ്ജി വി. സന്ദീപ് കൃഷ്ണയാണ് വിധി പ്രസ്താവിച്ചത്.

2025 ജനുവരി 17-നായിരുന്നു നാടിനെ നടുക്കിയ സംഭവം അരങ്ങേറിയത്. കുറുപ്പുംപടി ഓടക്കാലി കോട്ടച്ചിറയിലെ പ്ലൈവുഡ് കമ്പനിയിലെ സെക്യൂരിറ്റി ജീവനക്കാരനായിരുന്നു പ്രതി. പ്ലൈവുഡ് കമ്പനിയിൽ ജോലി ചെയ്തിരുന്ന അതിഥി തൊഴിലാളിയുടെ അഞ്ച് വയസ്സുകാരിയായ മകൾ, പിതാവിനെ അന്വേഷിച്ച് എത്തിയതായിരുന്നു. ഈ സമയം തന്ത്രപൂർവ്വം കുട്ടിയെ സമീപിച്ച പ്രതി, മിഠായി വാങ്ങിത്തരാമെന്ന് പറഞ്ഞ് ആളൊഴിഞ്ഞ സ്ഥലത്തേക്ക് കൂട്ടിക്കൊണ്ടുപോയി ക്രൂരമായി പീഡിപ്പിക്കുകയായിരുന്നു.

കുട്ടിയുടെ രക്ഷകർത്താക്കളുടെ പരാതിയെത്തുടർന്ന് കുറുപ്പുംപടി പോലീസ് കേസെടുക്കുകയായിരുന്നു. അന്നത്തെ ഇൻസ്പെക്ടർ വി.എം. കേഴ്സന്റെ നേതൃത്വത്തിൽ നടന്ന അന്വേഷണത്തിലാണ് പ്രതി പിടിയിലായത്. ശക്തമായ തെളിവുകളും പ്രോസിക്യൂഷൻ ഹാജരാക്കിയ വാദങ്ങളും കോടതി പരിഗണിച്ചു.

പോക്സോ നിയമത്തിലെ വിവിധ വകുപ്പുകൾ പ്രകാരം അഞ്ച് തവണയായാണ് ശിക്ഷ വിധിച്ചിട്ടുള്ളത്. ​മൂന്ന് വകുപ്പുകളിൽ 20 വർഷം വീതം കഠിനതടവും 50,000 രൂപ വീതം പിഴയും.​മറ്റ് രണ്ട് വകുപ്പുകളിൽ യഥാക്രമം അഞ്ച് വർഷവും ഏഴ് വർഷവും വീതം തടവും 20,000 രൂപ വീതം പിഴയും.

​ആകെ 72 വർഷത്തെ കഠിനതടവാണ് പ്രതിക്ക് ലഭിച്ചത്. പിഴയടയ്ക്കുന്നതിൽ വീഴ്ച വരുത്തിയാൽ തടവ് കാലാവധി വീണ്ടും വർദ്ധിക്കും. എന്നാൽ, ശിക്ഷാ കാലാവധി ഒന്നിച്ച് അനുഭവിച്ചാൽ മതിയെന്ന് കോടതി ഉത്തരവിട്ടു. വിധിക്ക് ശേഷം പ്രതിയെ വിയ്യൂർ സെൻട്രൽ ജയിലിലേക്ക് മാറ്റി. സ്പെഷ്യൽ പബ്ലിക് പ്രോസിക്യൂട്ടർ അഡ്വ. എ. സിന്ധു പ്രോസിക്യൂഷന് വേണ്ടി ഹാജരായി.