പൊലിഞ്ഞുപോയത് ഒരു കുടുംബത്തിന്റെ സ്വപ്നം; ഒമ്പതാം ക്ലാസുകാരൻ വീടിനുള്ളിൽ മരിച്ച നിലയിൽ
വെണ്ണിയോട്: ജില്ലയിൽ കൗമാരക്കാരുടെ ആത്മഹത്യകൾ തുടർച്ചയാകുന്നത് നാടിനെ ആശങ്കയിലാഴ്ത്തുന്നു. വെണ്ണിയോട് ബിനാച്ചി അമ്പലപറമ്പിൽ അബ്ദുള്ളയുടെ മകൻ മുഹമ്മദ് ഷാദിൽ (14) ആണ് ചൊവ്വാഴ്ച വൈകുന്നേരം വീടിനുള്ളിൽ മരിച്ച നിലയിൽ കാണപ്പെട്ടത്. വീട്ടിലെ ഹാളിനുള്ളിലാണ് മൃതദേഹം കണ്ടെത്തിയത്. മരണകാരണം സംബന്ധിച്ച് ദുരൂഹതകൾ നിലനിൽക്കെ പോലീസ് അന്വേഷണം ഊർജ്ജിതമാക്കി.
നാടിനെ നടുക്കിയ വിയോഗം
ചൊവ്വാഴ്ച വൈകുന്നേരത്തോടെയാണ് നാടിനെ നടുക്കിയ വാർത്ത പുറത്തുവന്നത്. സംഭവസമയത്ത് വീട്ടിൽ മറ്റാരും ഉണ്ടായിരുന്നില്ലെന്നാണ് പ്രാഥമിക വിവരം. പുറത്തുപോയി തിരിച്ചെത്തിയ വീട്ടുകാരാണ് ഹാളിനുള്ളിൽ ഷാദിലിനെ അബോധാവസ്ഥയിൽ കണ്ടെത്തിയത്. ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മരണത്തിൽ അസ്വാഭാവികത ഉണ്ടോ എന്ന് പരിശോധിക്കാൻ മൃതദേഹം ഇൻക്വസ്റ്റ് നടപടികൾക്ക് ശേഷം പോസ്റ്റ്മോർട്ടത്തിനായി മാറ്റി.
തുടർച്ചയാകുന്ന ദാരുണ സംഭവങ്ങൾ; ജില്ലയിൽ ആശങ്ക
വയനാട് ജില്ലയെ സംബന്ധിച്ചിടത്തോളം കഴിഞ്ഞ നാല് മാസത്തിനിടെ റിപ്പോർട്ട് ചെയ്യപ്പെടുന്ന മൂന്നാമത്തെ സമാനമായ സംഭവമാണിത്.
മാനന്തവാടി പീച്ചങ്കോട് സ്കൂളിലെ അധ്യാപകരുടെ മാനസിക പീഡനം ആരോപിച്ച് ഏഴാം ക്ലാസുകാരി ഫാത്തിമ ജീവനൊടുക്കിയിരുന്നു. മീനങ്ങാടിയിൽ ക്രൂരമായ പീഡനത്തിനിരയായ പതിനാറുകാരി മനസ്സ് തകർന്ന് ആത്മഹത്യയിൽ അഭയം തേടി.ഇപ്പോൾ വെണ്ണിയോട് ഒമ്പതാം ക്ലാസുകാരന്റെ വിയോഗം.
ഈ സംഭവങ്ങൾ കേവലം ഒറ്റപ്പെട്ട മരണങ്ങളായല്ല, മറിച്ച് സമൂഹത്തിന് നേരെ ഉയരുന്ന വലിയൊരു ചോദ്യചിഹ്നമായാണ് വായനക്കാർ കാണുന്നത്.
കൗമാരക്കാരിലെ മാനസിക സമ്മർദ്ദം: ജാഗ്രത വേണം
പഠനഭാരമാണോ, മൊബൈൽ ഫോണിന്റെ അമിത ഉപയോഗമാണോ അതോ വീട്ടിലെയും സ്കൂളിലെയും സാഹചര്യങ്ങളാണോ കുട്ടികളെ ഇത്തരം കടുംകൈകളിലേക്ക് നയിക്കുന്നത് എന്നതിൽ വിശദമായ പഠനം ആവശ്യമാണ്. കുട്ടികളുടെ പെരുമാറ്റത്തിൽ വരുന്ന ചെറിയ മാറ്റങ്ങൾ പോലും മാതാപിതാക്കൾ ഗൗരവമായി ശ്രദ്ധിക്കണമെന്ന് വിദഗ്ധർ മുന്നറിയിപ്പ് നൽകുന്നു.
ഷാദിലിന്റെ വേർപാടിൽ വെണ്ണിയോട് പ്രദേശം ഒന്നടങ്കം കണ്ണീരിലായിരിക്കുകയാണ്. കേസിൽ പോലീസ് അന്വേഷണം തുടരുന്നു.
Comments
Post a Comment