പി.എസ്.സി റെയിഞ്ച് ഫോറസ്റ്റ് ഓഫീസർ പരീക്ഷ: ഹെന്ന ഹാഷിമിന് സംസ്ഥാനതലത്തിൽ ഒന്നാം റാങ്ക്
കക്കയം: കേരള പബ്ലിക് സർവീസ് കമ്മീഷൻ നടത്തിയ റെയിഞ്ച് ഫോറസ്റ്റ് ഓഫീസർ പരീക്ഷയിൽ സംസ്ഥാനതലത്തിൽ ഒന്നാം റാങ്ക് നേടി ഹെന്ന ഹാഷിം നാടിന് അഭിമാനമായി. കഠിനാധ്വാനവും അർപ്പണബോധവും കൊണ്ട് സർക്കാർ സർവീസിലെ ഉന്നത തസ്തികയിലേക്കുള്ള ഈ നേട്ടം ശ്രദ്ധേയമാണ്.
നിലവിൽ കക്കയം ഫോറസ്റ്റ് സ്റ്റേഷനിൽ ഫോറസ്റ്റ് ഗാർഡായി സേവനമനുഷ്ഠിച്ചു വരികയാണ് ഹെന്ന. ജോലി ചെയ്യുന്ന അതേ വകുപ്പിൽ തന്നെ ഉന്നത പദവിയിലേക്ക് ഒന്നാം റാങ്കോടെ തിരഞ്ഞെടുക്കപ്പെട്ടു എന്നത് ഈ വിജയത്തിന്റെ തിളക്കം വർദ്ധിപ്പിക്കുന്നു.
കൂടരഞ്ഞി സ്വദേശിനിയായ ഹെന്ന ഹാഷിം, ഈന്തുങ്കൽ സ്വദേശികളായ ഷാഹുൽ ഹമീദ് – സുഹറ ദമ്പതികളുടെ മകൻ അൻവർ മസൂദിന്റെ ഭാര്യയാണ്. ഔദ്യോഗിക തിരക്കുകൾക്കിടയിലും പഠനത്തിനായി സമയം കണ്ടെത്തിയാണ് ഹെന്ന ഈ ഉന്നത വിജയം കരസ്ഥമാക്കിയത്.
ഹെന്നയുടെ ഈ നേട്ടത്തിൽ കക്കയം ഫോറസ്റ്റ് സ്റ്റേഷനിലെ സഹപ്രവർത്തകരും കൂടരഞ്ഞി നിവാസികളും അഭിനന്ദനങ്ങൾ അറിയിച്ചു. വനം വകുപ്പിലെ സേവന പാരമ്പര്യവും പ്രായോഗിക അറിവും റെയിഞ്ച് ഫോറസ്റ്റ് ഓഫീസർ എന്ന നിലയിലുള്ള തന്റെ പുതിയ ഉത്തരവാദിത്തങ്ങളിൽ ഏറെ സഹായകരമാകുമെന്ന് ഹെന്ന പറഞ്ഞു.
Comments
Post a Comment