വിവാഹം കഴിഞ്ഞ് ഒരാഴ്ച; മാതാപിതാക്കളെ കാണാനുള്ള യാത്രയ്ക്കിടയിൽ നവവധുവിന് ദാരുണാന്ത്യം
റിയാദ്: മംഗല്യപ്പട്ടുടുത്ത് പുത്തൻ ജീവിതത്തിലേക്ക് കാൽവെച്ച് ഒരാഴ്ച തികയും മുൻപേ, പ്രവാസലോകത്തുനിന്നും നോവായി മാറുകയാണ് വയനാട് സ്വദേശിനി ഹിദ നൗറിൻ. സൗദി അറേബ്യയിൽ വെച്ചുണ്ടായ ദാരുണമായ വാഹനാപകടത്തിൽ വയനാട് വൈത്തിരി സ്വദേശിനി ഹിദ നൗറിൻ (23) മരണപ്പെട്ടു. കഴിഞ്ഞ ആഴ്ചയായിരുന്നു ഹിദയുടെയും മലപ്പുറം സ്വദേശി യാസീൻ്റെയും വിവാഹം നടന്നത്.
വിവാഹശേഷം ഭർത്താവിനൊപ്പം സൗദിയിലെത്തിയ ഹിദ, അവിടെ ജോലി ചെയ്യുന്ന തൻ്റെ മാതാപിതാക്കളെ സന്ദർശിക്കാനായി പോകുന്നതിനിടെയാണ് അപകടം സംഭവിച്ചത്. മകളെയും മരുമകനെയും സ്വീകരിക്കാൻ കാത്തിരുന്ന മാതാപിതാക്കളുടെ അടുത്തേക്ക് എത്തുന്നതിന് തൊട്ടുമുൻപ് മരണം ഹിദയെ തട്ടിയെടുക്കുകയായിരുന്നു. സംഭവസ്ഥലത്തുവെച്ചുതന്നെ ഹിദ മരണത്തിന് കീഴടങ്ങി. അപകടത്തിൽ ഗുരുതരമായി പരിക്കേറ്റ ഭർത്താവ് യാസീൻ നിലവിൽ ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിലാണ്.
കണ്ണീരിലായ വൈത്തിരി ഗ്രാമം ഈ വിയോഗം ഇനിയും ഉൾക്കൊള്ളാനായിട്ടില്ല. ഒരാഴ്ച മുൻപ് വിവാഹ ആഘോഷങ്ങൾ നടന്ന വീട്ടിൽ ഇപ്പോൾ തോരാത്ത കണ്ണീർ മാത്രം. സൗദിയിലെ നടപടിക്രമങ്ങൾ പൂർത്തിയാക്കിയ ശേഷം മൃതദേഹം നാട്ടിലെത്തിക്കാനുള്ള ശ്രമങ്ങൾ നടന്നു വരികയാണെന്ന് പ്രവാസി സംഘടനകൾ അറിയിച്ചു.
Comments
Post a Comment