പുകയുയരുന്നത് കണ്ട് വ്യാപാരികൾ ഓടിക്കൂടി; പേരാമ്പ്രയിൽ തീയണച്ചത് മിനിറ്റുകൾക്കുള്ളിൽ

 

പേരാമ്പ്ര: ശനിയാഴ്ച വൈകുന്നേരം പേരാമ്പ്ര മാർക്കറ്റിന് സമീപമുള്ള കെട്ടിടത്തിന് പുറകുവശത്ത് തീപിടുത്തം ഉണ്ടായെങ്കിലും അഗ്നിരക്ഷാസേനയുടെ കൃത്യസമയത്തുള്ള ഇടപെടൽ മൂലം വൻ അപകടം ഒഴിവായി. വൈകുന്നേരം 4.30-ഓടെയാണ് സംഭവം നടന്നത്.

മുമ്പ് ബീവറേജ് കോർപ്പറേഷന്റെ ഔട്ട്‌ലെറ്റ് പ്രവർത്തിച്ചിരുന്ന കെട്ടിടത്തിലാണ് തീപിടുത്തമുണ്ടായത്. കെട്ടിടത്തിന്റെ പുറകുവശത്ത് നിന്ന് പുക ഉയരുന്നത് ശ്രദ്ധയിൽപ്പെട്ട സമീപത്തെ വ്യാപാരികൾ ഉടൻ തന്നെ പേരാമ്പ്ര അഗ്നിരക്ഷാ നിലയത്തിൽ വിവരം അറിയിക്കുകയായിരുന്നു. വിവരമറിഞ്ഞയുടൻ സ്ഥലത്തെത്തിയ അഗ്നിരക്ഷാ യൂണിറ്റ് തീയണച്ചതോടെ പരിഭ്രാന്തി ഒഴിവായി.

പ്രാഥമിക നിഗമനമനുസരിച്ച് വൈദ്യുത ഷോർട്ട് സർക്യൂട്ടാണ് തീപിടുത്തത്തിന് കാരണമായതെന്ന് കരുതുന്നു. കെട്ടിടത്തിന്റെ ഭിത്തിയിൽ ഘടിപ്പിച്ചിരുന്ന ഇലക്ട്രിക് മെയിൻ സ്വിച്ചിൽ നിന്നാണ് ആദ്യം തീപ്പൊരി ഉണ്ടായത്. ഇവിടെ നിന്നും സമീപത്ത് കൂട്ടിയിട്ടിരുന്ന മാലിന്യങ്ങളിലേക്ക് തീ പടരുകയായിരുന്നു.

സമയോചിതമായി തീയണക്കാൻ സാധിച്ചതിനാൽ കെട്ടിടത്തിന്റെ ഉൾഭാഗത്തേക്കോ സമീപത്തെ മറ്റ് വ്യാപാര സ്ഥാപനങ്ങളിലേക്കോ തീ പടർന്നില്ല. നിലവിൽ സ്ഥിതിഗതികൾ പൂർണ്ണമായും നിയന്ത്രണവിധേയമാണ്.