വിടപറഞ്ഞത് ആ മൂന്ന് വയസ്സുകാരിയെ തനിച്ചാക്കി; ഫോൺ വിളിക്ക് പിന്നാലെ തൻസീല പുഴയിലേക്ക്

 ആലുവ: നിമിഷനേരത്തെ വൈകാരികതയിൽ പൊലിഞ്ഞത് ഒരു മൂന്ന് വയസ്സുകാരിയുടെ അമ്മയുടെ തണൽ. കുടുംബ പ്രശ്നങ്ങളെ ത്തുടർന്ന് ആലുവ മണപ്പുറം നടപ്പാതയിൽ നിന്നും പെരിയാറിലേക്ക് ചാടിയ യുവതി ദാരുണമായി മരണപ്പെട്ടു. കരുമാല്ലൂർ വലിയപറമ്പിൽ ആഷിക്കിന്റെ ഭാര്യ തൻസീല (27) ആണ് ശനിയാഴ്ച രാവിലെ പുഴയിൽ ചാടി ജീവനൊടുക്കിയത്.

ഇന്നലെ രാവിലെയാണ് നാടിനെ നടുക്കിയ സംഭവം അരങ്ങേറിയത്. മണപ്പുറത്തെ നടപ്പാതയിലെത്തിയ തൻസീല അവിടെ വെച്ച് ഭർത്താവിനെ ഫോണിൽ വിളിച്ചതായും പ്രകോപിതയായി സംസാരിച്ചതായും ദൃക്‌സാക്ഷികൾ പറയുന്നു. സംഭാഷണത്തിന് തൊട്ടുപിന്നാലെ ആർക്കും തടയാനാകും മുൻപേ യുവതി പുഴയിലേക്ക് എടുത്തുചാടുകയായിരുന്നു. ഉടൻ തന്നെ നാട്ടുകാരും പോലീസും ഫയർഫോഴ്‌സിനെ വിവരമറിയിച്ചു.

വിവരമറിഞ്ഞെത്തിയ ആലുവ ഫയർഫോഴ്‌സും പോലീസും സംയുക്തമായി നടത്തിയ തിരച്ചിലിനൊടുവിൽ, ഏകദേശം 20 മിനിറ്റിനുശേഷം പാലത്തിൽ നിന്നും 40 മീറ്റർ അകലെ നിന്നാണ് മൃതദേഹം കണ്ടെത്തിയത്. ഉടൻ തന്നെ ആലുവ ജില്ലാ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

മരിച്ച തൻസീലയ്ക്ക് മൂന്ന് വയസ്സുള്ള ഒരു പെൺകുട്ടിയുണ്ട്. കുടുംബത്തിലെ തർക്കങ്ങളും മാനസിക പ്രയാസങ്ങളുമാണ് ഇത്തരമൊരു കടുത്ത തീരുമാനത്തിലേക്ക് യുവതിയെ നയിച്ചതെന്നാണ് പോലീസിന്റെ പ്രാഥമിക നിഗമനം. സംഭവത്തിൽ പോലീസ് കൂടുതൽ അന്വേഷണം ആരംഭിച്ചിട്ടുണ്ട്.

നിലവിൽ ആലുവ ജില്ലാ ആശുപത്രി മോർച്ചറിയിൽ സൂക്ഷിച്ചിരിക്കുന്ന മൃതദേഹം പോസ്റ്റ്‌മോർട്ടം നടപടികൾ പൂർത്തിയാക്കി ബന്ധുക്കൾക്ക് വിട്ടുനൽകും.