ഒരു 'സോറി'യിൽ തീരേണ്ട തർക്കം; അസഹിഷ്ണുതയുടെ ഇര; 19-കാരന്റെ നെഞ്ചിലേക്ക് ആഴ്ന്നത് ഒരു നാടിന്റെയാകെ സമാധാനം

 

കൊല്ലം: ആഘോഷത്തിമിർപ്പിനിടയിൽ വിറങ്ങലിച്ചുപോയ ഒരു നാട്. മുഖത്തല കിഴവൂർ ചെമ്പകശ്ശേരി ക്ഷേത്രോത്സവത്തിനിടെ ഉണ്ടായ സംഘർഷത്തിൽ 19 വയസ്സുകാരൻ തേജസ്സ് കൊല്ലപ്പെട്ട വാർത്ത കേരള മനസാക്ഷിയെത്തന്നെ ഞെട്ടിക്കുന്നതാണ്. ഒരു ചെറിയ തർക്കം കത്തിക്കുത്തിൽ അവസാനിച്ചപ്പോൾ ഇല്ലാതായത് ഒരു കുടുംബം വർഷങ്ങളായി നെയ്തുകൂട്ടിയ സ്വപ്നങ്ങളാണ്.

ഘോഷയാത്രയുടെ മുൻപിൽ ആവേശത്തോടെ നീങ്ങിയവർക്കിടയിൽ സംഘാടകനായി നിന്ന തേജസ്സിന് അബദ്ധത്തിൽ ഒരാളുടെ ചവിട്ടേറ്റു. "എന്തിനാണ് ചവിട്ടിയത്?" എന്ന തേജസ്സിന്റെ ചോദ്യം ഒരുപക്ഷേ ഒരു 'സോറി'യിൽ അവസാനിക്കേണ്ടതായിരുന്നു. എന്നാൽ, പുറത്തുനിന്നെത്തിയ സംഘത്തിലെ ഒരാൾ കരുതിക്കൂട്ടിയെന്നോണം കൈയ്യിൽ സൂക്ഷിച്ചിരുന്ന മാരകായുധമെടുത്ത് ആ യുവാവിന്റെ നെഞ്ചിലേക്ക് ആഴ്ത്തുകയായിരുന്നു. നാടിന്റെ പ്രിയപ്പെട്ടവനായിരുന്ന തേജസ്സ് നിമിഷങ്ങൾക്കകം അവിടെ പിടഞ്ഞുവീണു.

തേജസ്സിന് കൈക്കുഞ്ഞായിരിക്കുമ്പോഴേ അച്ഛനെ നഷ്ടപ്പെട്ടതാണ്. പിന്നീട് അമ്മ സൗമ്യ ഏറെ കഷ്ടപ്പെട്ടാണ് മക്കളെ വളർത്തിയത്. മക്കളെ ഒരു നിലയിലെത്തിക്കാൻ അവർ സഹിച്ച യാതനകൾക്കൊടുവിലാണ് ഏതാനും വർഷം മുമ്പ് സിവിൽ സപ്ലൈസിൽ ജോലി ലഭിച്ചത്. തന്റെ കഷ്ടപ്പാടുകൾ മകൻ തീർക്കുമെന്നും അവൻ വലിയൊരു എൻജിനീയറാകുമെന്നും ആ അമ്മ സ്വപ്നം കണ്ടു. എന്നാൽ ഒരു നിമിഷത്തെ അസഹിഷ്ണുത ആ അമ്മയുടെയും സഹോദരിയുടെയും ലോകം എന്നെന്നേക്കുമായി ഇരുട്ടിലാക്കി.

ആഘോഷങ്ങളിൽ പങ്കെടുക്കാൻ വരുമ്പോൾ എന്തിനാണ് ഈ യുവാക്കൾ മാരകായുധങ്ങൾ കൈയ്യിൽ കരുതുന്നത് എന്ന ഗൗരവകരമായ ചോദ്യമാണ് ഈ മരണം ഉയർത്തുന്നത്. ചെറിയൊരു തർക്കത്തിന് പോലും മറ്റൊരാളുടെ ജീവനെടുക്കാൻ മടിക്കാത്ത ഈ ക്രിമിനൽ സ്വഭാവം നമ്മുടെ സമൂഹത്തെ എവിടെ എത്തിക്കും? തേജസ്സിന്റെ മരണം നൽകുന്ന പാഠം ഭയപ്പെടുത്തുന്ന ഒരവസ്ഥയിലേക്കാണ് വിരൽ ചൂണ്ടുന്നത്.

കൊലപാതകത്തിന് ശേഷം ഒളിവിൽ പോയ പ്രതികൾക്കായി പോലീസ് അന്വേഷണം ഊർജിതമാക്കിയിട്ടുണ്ട്. ഒരു വീടിന്റെ വെളിച്ചം കെടുത്തിയവർക്ക് അർഹമായ ശിക്ഷ ലഭിക്കണമെന്ന ആവശ്യത്തിലാണ് നാടൊന്നാകെ.