പ്രിയപ്പെട്ടവനില്ലാത്ത ലോകം വേണ്ട; ഭർത്താവിന്റെ മൃതദേഹം കണ്ടതിന് പിന്നാലെ 17-ാം നിലയിൽ നിന്ന് ചാടി ഭാര്യയും മരിച്ചു

 

ബെംഗളൂരു: ജീവിതത്തിലെ പ്രിയപ്പെട്ടവന്റെ വിയോഗം കൺമുന്നിൽ കണ്ടുനിൽക്കാനാവാതെ സോഫ്റ്റ്‌വെയർ എഞ്ചിനീയറായ യുവതി ഫ്ലാറ്റിന്റെ പതിനേഴാം നിലയിൽ നിന്ന് ചാടി ജീവനൊടുക്കി. ഭർത്താവിനെ വീടിനുള്ളിൽ മരിച്ച നിലയിൽ കണ്ടെത്തിയതിന് തൊട്ടുപിന്നാലെയായിരുന്നു നാടിനെ നടുക്കിയ ഈ ദാരുണ സംഭവം. തെലങ്കാന സിദ്ദിപേട്ട് സ്വദേശികളായ ഭാനു ചന്ദർ റെഡ്ഡി കുന്ത (32), ഭാര്യ ബിബി ഷാസിയ സിറാജ് (31) എന്നിവരാണ് മരിച്ചത്.

​തിങ്കളാഴ്ച വൈകിട്ടോടെ ബെംഗളൂരുവിലെ ഇവരുടെ അപ്പാർട്ട്‌മെന്റിലായിരുന്നു സംഭവം. പ്രമുഖ ഐടി കമ്പനിയായ ഐബിഎമ്മിലെ ഉദ്യോഗസ്ഥയാണ് ബിബി ഷാസിയ. ജോലി കഴിഞ്ഞ് വൈകിട്ടോടെ ബിബി വീട്ടിലെത്തിയപ്പോൾ വീട് അകത്തുനിന്നും പൂട്ടിയ നിലയിലായിരുന്നു. ഏറെനേരം വാതിലിൽ മുട്ടിയിട്ടും ഉള്ളിൽ നിന്നും പ്രതികരണമൊന്നും ഉണ്ടാകാത്തതിനെ തുടർന്ന് ഇവർ അയൽക്കാരെയും പൊലീസിനെയും വിവരമറിയിച്ചു.

​തുടർന്ന് പൊലീസും അയൽക്കാരും ചേർന്ന് വീടിന്റെ വാതിൽ ബലംപ്രയോഗിച്ച് തുറന്നപ്പോഴാണ് ഭർത്താവ് ഭാനു ചന്ദറിനെ മുറിക്കുള്ളിൽ ജീവനൊടുക്കിയ നിലയിൽ കണ്ടെത്തിയത്. അപ്രതീക്ഷിതമായ ഈ കാഴ്ച കണ്ടുനിന്ന ബിബി ഷാസിയ, നിമിഷങ്ങൾക്കകം ആപ്പാർട്ട്‌മെന്റിന്റെ 17-ാം നിലയിൽ നിന്ന് താഴേക്ക് ചാടുകയായിരുന്നു. ഗുരുതരമായി പരിക്കേറ്റ യുവതി സംഭവസ്ഥലത്ത് വെച്ച് തന്നെ മരണപ്പെട്ടു.

​ഒരേ നാട്ടുകാരായ ഇരുവരും പ്രണയിച്ച് വിവാഹം കഴിച്ചവരാണെന്നാണ് പ്രാഥമിക വിവരം. ഇവരുടെ ദാമ്പത്യ ജീവിതത്തിൽ എന്തെങ്കിലും തരത്തിലുള്ള അസ്വാരസ്യങ്ങളോ സാമ്പത്തിക ബുദ്ധിമുട്ടുകളോ ഉണ്ടായിരുന്നോ എന്ന് പൊലീസ് അന്വേഷിച്ചു വരികയാണ്. സംഭവത്തിൽ അസ്വാഭാവിക മരണത്തിന് കേസെടുത്ത പൊലീസ്, പോസ്റ്റ്‌മോർട്ടം നടപടികൾ പൂർത്തിയാക്കി മൃതദേഹം ബന്ധുക്കൾക്ക് വിട്ടുനൽകുമെന്ന് അറിയിച്ചു. പെട്ടെന്നുണ്ടായ പ്രിയപ്പെട്ടവന്റെ മരണം ബിബി ഷാസിയയെ മാനസികമായി തളർത്തിയതാകാം ഇത്തരമൊരു കടുത്ത തീരുമാനത്തിലേക്ക് നയിച്ചതെന്നാണ് കരുതപ്പെടുന്നത്.