പൂഴിത്തോട് തെരുവുനായ ശല്യം രൂക്ഷം; ജനങ്ങൾ ഭീതിയിൽ

 

പൂഴിത്തോട്: പൂഴിത്തോട് സെന്റ് മേരീസ് പരിസരത്ത് തെരുവുനായ ശല്യം നിയന്ത്രണാതീതമാകുന്നു. പകലെന്നോ രാത്രിയെന്നോ ഭേദമില്ലാതെ കൂട്ടമായെത്തുന്ന നായകൾ ജനങ്ങളുടെ ജീവിതത്തിന് വലിയ ഭീഷണിയാണ് ഉയർത്തുന്നത്.

രാത്രികാലങ്ങളിൽ വീടിനു പുറത്തുവെക്കുന്ന ചെരിപ്പുകളും മറ്റ് വസ്തുക്കളും നായകൾ കടിച്ചു കീറി നശിപ്പിക്കുന്നത് ഇവിടെ പതിവായിരിക്കുകയാണ്. രാവിലെ എഴുന്നേൽക്കുമ്പോൾ വീടിന്റെ ഉമ്മറത്തും പരിസരത്തും സാധനങ്ങൾ നശിപ്പിക്കപ്പെട്ട നിലയിൽ കാണുന്നത് വീട്ടുകാരെ ഏറെ ബുദ്ധിമുട്ടിക്കുന്നു. രാത്രികാലങ്ങളിൽ കൂട്ടമായെത്തുന്ന നായകൾ ഭീതിതമായ അന്തരീക്ഷമാണ് പ്രദേശത്ത് സൃഷ്ടിക്കുന്നത്.

സ്കൂൾ കുട്ടികൾക്കും കാൽനടയാത്രക്കാർക്കും നേരെ നായകൾ ആക്രമണത്തിന് മുതിരുന്നത് വലിയ ആശങ്കയ്ക്ക് കാരണമാകുന്നുണ്ട്. ഇരുചക്ര വാഹനങ്ങൾക്ക് പിന്നാലെ നായകൾ ഓടുന്നത് അപകടങ്ങൾക്കും വഴി വെക്കുന്നു. നായകളെ ഭയന്ന് പുറത്തിറങ്ങാൻ പോലും പറ്റാത്ത അവസ്ഥയാണെന്ന് നാട്ടുകാർ പരാതിപ്പെടുന്നു.

സെന്റ് മേരീസ് പ്രദേശത്തെ ഈ ദുരിതാവസ്ഥയ്ക്ക് അടിയന്തര പരിഹാരം കാണണമെന്നാണ് നാട്ടുകാരുടെ ആവശ്യം. തെരുവുനായ്ക്കളെ നിയന്ത്രിക്കാൻ പഞ്ചായത്ത് അധികൃതർ ഉടൻ നടപടി സ്വീകരിക്കണമെന്നും ജനങ്ങളുടെ സുരക്ഷ ഉറപ്പാക്കണമെന്നും ആവശ്യപ്പെട്ട് പ്രതിഷേധം ശക്തമാവുകയാണ്.