പ്രവാസം വിട്ട് മണ്ണിലേക്കിറങ്ങി; വന്യമൃഗശല്യത്തിൽ പൊറുതിമുട്ടി കൂരാച്ചുണ്ടിലെ യുവകർഷകൻ സോണി തേനംമാക്കൽ

 

കൂരാച്ചുണ്ട്: സ്വപ്നങ്ങളുമായി വിദേശത്തെ ജോലി ഉപേക്ഷിച്ച് മണ്ണിലിറങ്ങിയ യുവകർഷകൻ വന്യമൃഗശല്യത്തെ തുടർന്ന് കൃഷി ഉപേക്ഷിക്കാനൊരുങ്ങുന്നു. കൂരാച്ചുണ്ട് പഞ്ചായത്തിലെ തേനംമാക്കൽ സോണിയാണ് കാട്ടുപന്നിയും മുള്ളൻപന്നിയും മയിലുകളും ചേർന്ന് കൃഷി നശിപ്പിക്കുന്നതിലൂടെ ലക്ഷങ്ങളുടെ നഷ്ടം നേരിടുന്നത്.

പതിറ്റാണ്ടുകൾക്ക് മുൻപ് പാലാ രാമപുരത്ത് നിന്നും കുടിയേറിയതാണ് സോണിയുടെ കുടുംബം. 1943-ൽ സോണിയുടെ വലിയപ്പൻ ടി.വി. വർക്കി ബാലുശ്ശേരി കോവിലകത്ത് നിന്നും വാങ്ങിയ 20 ഏക്കർ സ്ഥലത്താണ് ഇവരുടെ കൃഷി ആരംഭിച്ചത്. 2007 മുതൽ 12 വർഷക്കാലം വിദേശത്ത് നേഴ്സായി ജോലി ചെയ്തിരുന്ന സോണി, പിതാവ് തോമസിന്റെ മരണശേഷമാണ് കൃഷിയിൽ സജീവമാകാൻ നാട്ടിലെത്തിയത്.

കൈവിട്ട് പോകുന്ന സ്വപ്നങ്ങൾ

മൂന്നേക്കറോളം വരുന്ന സ്ഥലത്ത് തെങ്ങ്, കവുങ്ങ്, വാഴ, ഇഞ്ചി, ചേന എന്നിവ സോണി നട്ടുപിടിപ്പിച്ചിട്ടുണ്ട്. എന്നാൽ വിളവെടുക്കാറാകുമ്പോഴേക്കും കാട്ടുപന്നികളും മുള്ളൻപന്നികളും കൃഷി പൂർണ്ണമായും നശിപ്പിക്കുകയാണ്. നാല് വർഷം മുൻപ് വരെ രണ്ട് ലക്ഷം രൂപയ്ക്ക് വരെ കപ്പ വിറ്റിരുന്ന സ്ഥാനത്ത്, ഇന്ന് സ്വന്തം ആവശ്യത്തിനുള്ള കപ്പ പോലും പുറത്തുനിന്ന് വാങ്ങേണ്ടി വരുന്ന ഗതികേടിലാണെന്ന് ഈ 42-കാരൻ വേദനയോടെ പറയുന്നു.

മയിലുകളും വില്ലനായി

ഭക്ഷ്യ സ്വയംപര്യാപ്തത ലക്ഷ്യമിട്ട് 2024-ൽ സോണി നെൽകൃഷി ഇറക്കിയിരുന്നു. 50 കിലോയോളം അരി ഉൽപാദിപ്പിക്കാനും സാധിച്ചു. എന്നാൽ മയിലുകൾ കൂട്ടത്തോടെയിറങ്ങി നെല്ല് നശിപ്പിക്കാൻ തുടങ്ങിയതോടെ ആ ഉദ്യമവും ഉപേക്ഷിക്കേണ്ടി വന്നു.

"മണ്ണിൽ വിയർപ്പൊഴുക്കി ഉണ്ടാക്കിയെടുക്കുന്നതെല്ലാം വന്യമൃഗങ്ങൾ നശിപ്പിക്കുകയാണ്. ഇനി എന്ത് ചെയ്യണമെന്ന് അറിയില്ല. ഇവിടം വിട്ടുപോയാൽ മതിയെന്ന അവസ്ഥയിലാണ് ഇപ്പോൾ."

— സോണി തേനംമാക്കൽ

വന്യമൃഗശല്യം തടയാൻ അധികൃതരുടെ ഭാഗത്തുനിന്ന് കാര്യമായ നടപടികളുണ്ടാകാത്തതാണ് സോണിയെപ്പോലുള്ള യുവകർഷകരെ കൃഷിയിൽ നിന്നും പിന്തിരിപ്പിക്കുന്നത്.