ചക്കിട്ടപാറയിൽ പെരുമാറ്റ ചട്ടം സംബന്ധിച്ച യോഗം ചേർന്നു

 

ചക്കിട്ടപാറ: ഡിസംബർ 11 ന് നടക്കുന്ന തദ്ദേശ സ്വയംഭരണ പൊതു തിരഞ്ഞെടുപ്പിൽ സ്ഥാനാർത്ഥികളും രാഷ്ട്രീയ സംഘടനകളും പാലിക്കേണ്ട പെരുമാറ്റച്ചട്ടം സംബന്ധിച്ച നിർദേശങ്ങൾ ഫലപ്രദമായി നടപ്പാക്കുന്നതിനായി ചക്കിട്ടപാറ ഗ്രാമ പഞ്ചായത്തിലെ സ്ഥാനാർത്ഥികൾ, രാഷ്ട്രീയ പാർട്ടി പ്രതിനിധികൾ, ഹരിതകർമ്മ സേന, കുടുംബശ്രീ പ്രവർത്തകർ എന്നിവരുടെ സംയുക്ത യോഗം ചേർന്നു. റിട്ടേണിങ്ങ് ഓഫീസറുടെ നിർദ്ദേശാനുസരണം ചേർന്ന യോഗത്തിൽ പഞ്ചായത്ത് സെക്രട്ടറി ഇ. പി. സജിത്ത് അധ്യക്ഷത വഹിച്ചു. നിയമാനുസൃതം പ്രചരണത്തിൽ പാലിക്കേണ്ട കാര്യങ്ങൾ സംബന്ധിച്ച് പേരാമ്പ്ര ബ്ലോക്ക് തല തെരഞ്ഞെടുപ്പ് ചെലവ് നിരീക്ഷകനും സംസ്ഥാന ഫൈനാൻസ് ജോയിൻ്റ് സെക്രട്ടറിയുമായ എ.സി. ഉബൈദുള്ള വിവരിച്ചു ചക്കിട്ടപാറ ഗ്രാമ പഞ്ചായത്ത്  അസി.സെക്രട്ടറി ടി.പി. സീന, തെരഞ്ഞെടുപ്പ് ഉദ്യോഗസ്ഥയും ചക്കിട്ടപാറ കൃഷി ഓഫീസറുമായ രശ്മ നായർ എന്നിവർ പ്രസംഗിച്ചു.