സഹോദരി മരിച്ചെന്ന് വിശ്വസിച്ചില്ല ബാങ്കിന്റെ കടുംപിടുത്തത്തിന് മുന്നിൽ തോറ്റ ജിത്തു; മരിച്ച സഹോദരിയുടെ മൃതദേഹവുമായി ബാങ്കിൽ

 

ഒഡീഷ: അധികൃതരുടെ നിരുത്തരവാദപരമായ സമീപനവും മാനുഷിക മൂല്യങ്ങൾ തൊട്ടുതീണ്ടാത്ത ഭരണകൂട സംവിധാനങ്ങളും ഒരു പാവപ്പെട്ടവനെ എത്തിച്ചത് തീരാദുരന്തത്തിലേക്ക്. ഒഡീഷയിലെ ഒഡീഷ ഗ്രാമീണ ബാങ്കിലാണ് ഹൃദയം തകർക്കുന്ന ഈ സംഭവം അരങ്ങേറിയത്. സഹോദരിയുടെ അക്കൗണ്ടിലുള്ള തുക പിൻവലിക്കാൻ പലതവണ കയറിയിറങ്ങിയ കൂലിപ്പണിക്കാരനായ ജിത്തു മുണ്ടയ്ക്ക് ഒടുവിൽ നേരിടേണ്ടി വന്നത് കടുത്ത അപമാനവും ദുരനുഭവവുമാണ്.

​  തന്റെ മരണപ്പെട്ട സഹോദരിയുടെ അക്കൗണ്ടിൽ ഉണ്ടായിരുന്ന 19,300 രൂപ പിൻവലിക്കാനാണ് ജിത്തു മുണ്ട ബാങ്കിലെത്തിയത്. തുക കൈമാറുന്നതിനായി സഹോദരി നേരിട്ട് ഹാജരാകണമെന്നായിരുന്നു ബാങ്ക് അധികൃതരുടെ ഏകപക്ഷീയമായ നിലപാട്. സഹോദരി മരണപ്പെട്ടു എന്ന് ജിത്തു നിരവധി തവണ അപേക്ഷിച്ചിട്ടും, അതിനുള്ള നിയമപരമായ വഴികളോ മാർഗ്ഗനിർദ്ദേശങ്ങളോ പറഞ്ഞു കൊടുക്കാൻ അധികൃതർ തയ്യാറായില്ല. പകരം, ആവർത്തിച്ച് അദ്ദേഹത്തെ ബാങ്കിൽ നിന്നും തിരിച്ചയക്കുകയായിരുന്നു പതിവ്.

​

​ഏറെക്കാലമായി തുടരുന്ന ഈ അവഗണനയിൽ മനംമടുത്ത ജിത്തു മുണ്ട ഒടുവിൽ കടുത്ത തീരുമാനത്തിലേക്ക് എത്തി. താൻ പറയുന്നതൊന്നും വിശ്വസിക്കാൻ തയ്യാറാകാത്ത ബാങ്ക് ഉദ്യോഗസ്ഥർക്ക് മുന്നിൽ സഹോദരിയുടെ മരണം തെളിയിക്കുക എന്ന ലക്ഷ്യത്തോടെ, സഹോദരിയുടെ കുഴിമാടത്തിൽ നിന്ന് മൃതദേഹം പുറത്തെടുത്ത് ചാക്കിലാക്കി അദ്ദേഹം ബാങ്കിലേക്ക് എത്തി. സഹോദരിയുടെ അവസ്ഥയെങ്കിലും നേരിൽ കണ്ടാൽ തനിക്ക് ആ പണം ലഭിക്കുമെന്ന് ആ പാവം മനുഷ്യൻ നിഷ്കളങ്കമായി വിശ്വസിച്ചു.

​

​ഈ സംഭവം വലിയ സാമൂഹിക ചർച്ചകൾക്കാണ് വഴിവെച്ചിരിക്കുന്നത്. രാജ്യത്ത് വൻകിട കോർപ്പറേറ്റ് കമ്പനികൾക്ക് കോടിക്കണക്കിന് രൂപയുടെ വായ്പകൾ എഴുതിത്തള്ളുന്ന സംവിധാനത്തിന്, ഒരു പാവപ്പെട്ടവന് മരണപ്പെട്ട സഹോദരിയുടെ അക്കൗണ്ടിലുള്ള തുച്ഛമായ തുക കൈമാറാൻ മാത്രം ഒരു നിയമവും ഓപ്ഷനും ഇല്ലാതെ പോകുന്നത് വലിയൊരു സാമൂഹിക അനീതിയായി മാറുകയാണ്.

​ഒരു വലിയ ചോദ്യം:

ബാങ്ക് ഉദ്യോഗസ്ഥർക്ക് വിചാരിച്ചാൽ ചെയ്യാവുന്ന കാര്യമേയുള്ളൂ ഇത്. മാനുഷികമായ ഒരു സമീപനം ഉണ്ടായിരുന്നുവെങ്കിൽ ജിത്തു മുണ്ടയെ ഇത്രയും വലിയൊരു സാഹസത്തിന് അവർ നിർബന്ധിക്കില്ലായിരുന്നു. നിയമത്തിന്റെ പേര് പറഞ്ഞ് പാവപ്പെട്ടവനെ വട്ടം കറക്കുന്ന ഈ ഉദ്യോഗസ്ഥരുടെ മനോഭാവം മാറേണ്ടിയിരിക്കുന്നു. കോർപ്പറേറ്റുകൾക്ക് ചുവപ്പുപരവതാനി വിരിക്കുന്ന ബാങ്കുകൾ, ഒരു സാധാരണക്കാരന്റെ കണ്ണീരിന് വിലകൽപ്പിക്കാത്തത് രാജ്യത്തിന്റെ ദുരവസ്ഥയാണ് വിളിച്ചോതുന്നത്.

​സംഭവം ഇതിനകം ദേശീയ തലത്തിൽ തന്നെ വലിയ പ്രതിഷേധങ്ങൾക്കും ചർച്ചകൾക്കും വഴിവെച്ചിട്ടുണ്ട്. ബാങ്കിന്റെ കടുംപിടുത്തവും ഉദ്യോഗസ്ഥരുടെ അനാസ്ഥയുംക്കെതിരെ ശക്തമായ നടപടികൾ വേണമെന്ന ആവശ്യം ഉയരുകയാണ്.