അപകടച്ചുഴിയിൽ പൊലിഞ്ഞത് കൗമാരസ്വപ്നങ്ങൾ; അമ്മയുടെ വിലക്ക് മറികടന്ന ആ യാത്ര അവസാനിച്ചത് കടന്തറപ്പുഴയുടെ ആഴങ്ങളിൽ.
മരുതോങ്കര: പ്ലസ് ടു പരീക്ഷ കഴിഞ്ഞതിന്റെ ആഹ്ലാദത്തിൽ സുഹൃത്തുക്കൾക്കൊപ്പം പുഴയിൽ കുളിക്കാനിറങ്ങിയ വിദ്യാർത്ഥി മുങ്ങിമരിച്ചു. ഊരത്ത് പന്നിവയൽ സ്വദേശികളായ ശ്രീജിത്ത്-വിജി ദമ്പതികളുടെ മകൻ ഷാഹുൽ (18) കടുന്തറപ്പുഴയിലെ അപകടച്ചുഴിയിൽപ്പെട്ട് ജീവൻ വെടിഞ്ഞത്.
അമ്മയുടെ വിലക്ക് അവഗണിച്ചുള്ള യാത്ര
കുടുംബത്തിന്റെ ഏക അത്താണിയാകേണ്ട മകന്റെ വിയോഗം നാടിനെയാകെ കണ്ണീരിലാഴ്ത്തി. ജോലിക്ക് പോയ അമ്മയെ വിളിച്ച് അനുവാദം ചോദിച്ചെങ്കിലും പുഴയിൽ പോകരുതെന്ന് വിജി കർശനമായി നിർദ്ദേശിച്ചിരുന്നു. എന്നാൽ മാതാവിന്റെ വാക്കുകൾ അവഗണിച്ചു സുഹൃത്തുക്കൾക്കൊപ്പം പോയതാണ് വൻ ദുരന്തത്തിൽ കലാശിച്ചത്. സൈക്കിളിൽ മീൻ വിൽപന നടത്തിയിരുന്ന പിതാവ് ശ്രീജിത്ത്, ആരോഗ്യപ്രശ്നങ്ങൾ കാരണം നിലവിൽ വിശ്രമത്തിലാണ്. യത്തീംഖാനയിൽ ഭക്ഷണം പാകം ചെയ്യുന്ന ജോലിക്ക് പോയി വിജി കണ്ടെത്തുന്ന തുച്ഛമായ വരുമാനത്തിലായിരുന്നു ഈ കുടുംബം പുലർന്നിരുന്നത്.
വിട്ടുമാറാത്ത കടന്തറപ്പുഴയിലെ ഭീതി
പത്തുവർഷം മുൻപ്, 2016 സെപ്റ്റംബറിൽ ഇതേ സ്ഥലത്തുവെച്ച് ആറ് ജീവനുകൾ പൊലിഞ്ഞ സംഭവം ഇന്നും നാട്ടുകാരുടെ മനസ്സിൽ ഉണങ്ങാത്ത മുറിവായി അവശേഷിക്കുന്നുണ്ട്. അപകടമേഖലയാണെന്ന മുന്നറിയിപ്പുകൾ പലപ്പോഴും യുവാക്കളും കുട്ടികളും ഗൗരവമായി എടുക്കാത്തതാണ് ഇത്തരം ആവർത്തിക്കുന്ന ദുരന്തങ്ങൾക്ക് കാരണമെന്ന് നാട്ടുകാർ പറയുന്നു.
പാഠമാകേണ്ട വിയോഗം
വളർത്തി വലുതാക്കിയ മാതാപിതാക്കളുടെ തണലാകേണ്ട മക്കൾ, ഒരു നിമിഷത്തെ ആവേശത്തിലോ അശ്രദ്ധയിലോ എടുക്കുന്ന തീരുമാനങ്ങൾ തകർക്കുന്നത് ഒരു കുടുംബത്തെയാകെയാണ്. ശ്രീജിത്ത്-വിജി ദമ്പതികൾക്ക് മൂന്നാം ക്ലാസിൽ പഠിക്കുന്ന ഒരു മകൻ കൂടി ഉണ്ട്.
രക്ഷിതാക്കളുടെ നിർദ്ദേശങ്ങൾ പാലിക്കുന്നതിലും അപകടസാധ്യതയുള്ള ഇടങ്ങളിൽ ജാഗ്രത പുലർത്തുന്നതിലും നമ്മുടെ മക്കൾ കൂടുതൽ ശ്രദ്ധ കാണിക്കേണ്ടതുണ്ട് എന്ന് ഈ സംഭവം വീണ്ടും നമ്മെ ഓർമ്മിപ്പിക്കുന്നു.
Comments
Post a Comment