കോടീശ്വരന്മാർക്കിടയിൽ 'അപൂർവ്വ' സ്ഥാനാർത്ഥി; ആസ്തി 84 രൂപ ആവേശം ആവോളം; ഏറ്റുമാനൂരിലെ ഈ 26-കാരി ഒരു വിസ്മയമാണ്

 കോട്ടയം: ആഡംബര വാഹനങ്ങളും കോടികളുടെ ആസ്തി വിവരണങ്ങളും നിറഞ്ഞ നാമനിർദ്ദേശ പത്രികകൾക്കിടയിൽ, കേവലം 84 രൂപയുടെ ആസ്തിയുമായി ഒരു 26-കാരി കേരള രാഷ്ട്രീയത്തിന്റെ ശ്രദ്ധാകേന്ദ്രമാകുന്നു. ഏറ്റുമാനൂർ നിയോജക മണ്ഡലത്തിലെ എസ്.യു.സി.ഐ (SUCI) സ്ഥാനാർത്ഥി ആഷ്ന തമ്പിയാണ് തിരഞ്ഞെടുപ്പ് ഗോദയിലെ ഈ വിസ്മയം. കേരളത്തിലെ ഏറ്റവും ആസ്തി കുറഞ്ഞ സ്ഥാനാർത്ഥിയെന്ന വിശേഷണത്തോടെയാണ് ഈ യുവപോരാളി ജനവിധി തേടുന്നത്.

കൈവശം 40 രൂപ, ബാങ്കിൽ 44

നാമനിർദ്ദേശ പത്രിക സമർപ്പിക്കുമ്പോൾ ആഷ്നയുടെ കൈവശമുണ്ടായിരുന്നത് വെറും 40 രൂപയായിരുന്നു. ബാങ്ക് അക്കൗണ്ടിലാകട്ടെ 44 രൂപയും. സ്വന്തമായി വീടോ, ഭൂമിയോ, വാഹനമോ, സ്വർണ്ണമോ ഈ സ്ഥാനാർത്ഥിക്കില്ല. പത്രികയുടെ സൂക്ഷ്മപരിശോധനാ ദിവസം 19 രൂപയ്ക്ക് ഫോൺ റീചാർജ് ചെയ്തതോടെ അക്കൗണ്ട് ബാലൻസ് 25 രൂപയായി കുറഞ്ഞു. മറ്റ് വരുമാന മാർഗങ്ങളൊന്നുമില്ലാത്ത ആഷ്ന, രാഷ്ട്രീയ പ്രവർത്തനത്തിനുള്ള കരുത്ത് പണമല്ല മറിച്ച് ജനപക്ഷത്തു നിൽക്കാനുള്ള ആർജ്ജവമാണെന്ന് അടിവരയിടുന്നു.

പ്രചാരണം ജനകീയ പിരിവിലൂടെ

നിർദ്ധനരായ രോഗികളും കൂട്ടിരിപ്പുകാരും എത്തുന്ന കോട്ടയം മെഡിക്കൽ കോളേജ് പരിസരത്ത് പൊതുജനങ്ങളിൽ നിന്ന് ചെറിയ തുകകൾ പിരിച്ചെടുത്താണ് ആഷ്ന തന്റെ പ്രചാരണ പ്രവർത്തനങ്ങൾ മുന്നോട്ട് കൊണ്ടുപോകുന്നത്. ആഡംബരങ്ങളില്ലാത്ത ഈ പ്രചാരണ ശൈലി ഇതിനോടകം തന്നെ നാട്ടുകാർക്കിടയിൽ വലിയ ചർച്ചയായിട്ടുണ്ട്. സാധാരണക്കാരുടെ പ്രശ്നങ്ങൾ നിയമസഭയിൽ എത്തിക്കാൻ ജനങ്ങൾ നൽകുന്ന ഈ കുഞ്ഞു സംഭാവനകൾ തന്നെ ധാരാളമെന്ന് ആഷ്ന വിശ്വസിക്കുന്നു.

സമരമുഖത്തെ കനൽവഴി

വെറുമൊരു സ്ഥാനാർത്ഥി എന്നതിലുപരി സമരവീര്യമുള്ള ഒരു വ്യക്തിത്വമാണ് ആഷ്നയുടേത്. ആശാ വർക്കർമാരുടെ സമരത്തിന് ഐക്യദാർഢ്യം പ്രഖ്യാപിച്ച് സ്വന്തം മുടി മുറിച്ചു നൽകിയത് അന്ന് വലിയ വാർത്താപ്രാധാന്യം നേടിയിരുന്നു. എറണാകുളം മഹാരാജാസ് കോളേജിൽ എ.ഐ.ഡി.എസ്.ഒ പ്രതിനിധിയായി മത്സരിച്ച് രാഷ്ട്രീയത്തിൽ ചുവടുറപ്പിച്ച ഇവർ ജേണലിസത്തിൽ പി.ജി ഡിപ്ലോമ ബിരുദധാരിയാണ്.

നിലവിൽ എസ്.യു.സി.ഐ (കമ്മ്യൂണിസ്റ്റ്) പാർട്ടിയുടെ മീഡിയ കോഓർഡിനേറ്റർ, ജില്ലാ കമ്മിറ്റി അംഗം, എ.ഐ.ഡി.എസ്.ഒ സംസ്ഥാന സെക്രട്ടേറിയേറ്റംഗം എന്നീ നിലകളിൽ സജീവമാണ്. പണക്കൊഴുപ്പുള്ള തിരഞ്ഞെടുപ്പ് രാഷ്ട്രീയത്തിൽ, ആദർശവും ആർജ്ജവവും കൈമുതലാക്കി ആഷ്ന തമ്പി നടത്തുന്ന ഈ പോരാട്ടം രാഷ്ട്രീയ കേരളത്തിന് പുതിയൊരു പാഠപുസ്തകമാവുകയാണ്