കോഴിക്കോട് റെയിൽവേ സ്റ്റേഷനിൽ കുതിച്ചുപാഞ്ഞ വന്ദേഭാരത്, പ്ലാറ്റ്‌ഫോമിൽ തനിച്ചായ പത്തു വയസ്സുകാരൻ; രക്ഷകനായി ശ്രീകാന്ത്

കോഴിക്കോട് റെയിൽവേ സ്റ്റേഷനിലെ നാലാം നമ്പർ പ്ലാറ്റ്‌ഫോമിൽ വിറങ്ങലിച്ചു നിന്ന ആ നിമിഷങ്ങൾ ആരും മറക്കില്ല. വന്ദേഭാരത് എക്സ്പ്രസ്സ് ലക്ഷ്യസ്ഥാനത്തേക്ക് നീങ്ങിത്തുടങ്ങിയപ്പോൾ, തന്റെ ഉറ്റവർ ട്രെയിനിനുള്ളിലായതും താൻ പ്ലാറ്റ്‌ഫോമിൽ ഒറ്റപ്പെട്ടതും ആ പത്തു വയസ്സുകാരൻ തിരിച്ചറിഞ്ഞത് ഞെട്ടലോടെയാണ്. അടഞ്ഞ ഓട്ടോമാറ്റിക് വാതിലുകൾക്കും വേഗത എടുത്തു തുടങ്ങിയ ട്രെയിനിനുമിടയിൽ എന്തുചെയ്യണമെന്നറിയാതെ കരഞ്ഞുകൊണ്ട് വണ്ടിക്കു പിന്നാലെ ഓടാൻ തുടങ്ങിയ ആ കുഞ്ഞിന് മുന്നിൽ ദൈവത്തെപ്പോലെയാണ് റെയിൽവേ പോലീസ് ഉദ്യോഗസ്ഥൻ ശ്രീകാന്ത് എത്തിയത്.

ഭാരമേറിയ ട്രോളി ബാഗുമായി പരിഭ്രാന്തനായി ഓടിയ കുട്ടി അപകടത്തിൽപ്പെടാൻ സാധ്യതയുണ്ടെന്ന് കണ്ട ശ്രീകാന്ത് ഒട്ടും വൈകാതെ അവനെ ചേർത്തുപിടിച്ചു. കുട്ടിയുടെ പക്കൽ നിന്നും ലഭിച്ച നമ്പറിലൂടെ മാതാപിതാക്കളെ വിവരമറിയിച്ചു. ഒടുവിൽ ചങ്ങല വലിച്ച് ട്രെയിൻ നിർത്തി കുട്ടിയെ മാതാപിതാക്കൾക്കരികിൽ സുരക്ഷിതമായി എത്തിച്ചപ്പോൾ ഒരു വലിയ ദുരന്തമാണ് ഒഴിവായത്. തന്റെ ജോലിയിലെ കൃത്യനിഷ്ഠ കൊണ്ടും കരുതലുകൊണ്ടും കൈയടി നേടുകയാണ് ഈ ഉദ്യോഗസ്ഥൻ.